ما هو التسليك ؟
تعريف التسليك :
هو ان تعطي المتحدث جوه يعني تمشيله وتحسسه انك مهتم ومتحمس لسالفته وانت منتب يمه او داري انه تسذوب او سامج
أحكام التسليك :
1) تسليك واجب [ هذا التسليك لما ابوك ولاامك قاعدين ينكتون وانت تضحك وتسلكلهم غصب حتى لو كانت النكته سامجه لكن واجب تضحك لان لو ماضحكت يعتبرمن عقوق الوالدين ]
2) تسليك واجب [ مثلا لو خويك قاعد يتلاسن هو وواحد ثاني و جاء خويك وذب ذبه على اللي يلاسنه , في ذا الوقت واجب انك تضحك حتى لو كانت الذبه سامجه لانه خويك ]
3) تسليكـ مستحب[هذا لما تقابل واحد من زمان ماشفته اوتقابل واحد اول مره تشوفه او واحد توكـ متعرف عليه وقال لك نكته , المستحب انك تسلكله حتى لوهي سامجه ]
4) تسليك فرض كفايه [ هذا لما يشرح المدرس درس واجب على الطلاب يسلكون له حتى لو مافهمو الشرح علشان يخلص بسرعه , فلو سلك طالب واحد سقط التسليك عن الطلاب الباقين ]
5) تسليك حرام [ هذا لما خويك او اي واحد يقعد ينكت على العالم ويذب عليهم من وراهم وانت تضحك وتسلكله هذا يعتبر حرام لانه من الغيبه ]
متى تترك التسليك وتبدأ بـ التزبيد ؟
يعني فيه شي يخليك تترك التسليك و تقعد تزبد لـ العالم , مثلا واحد دايم يفقش عليك ويعطيك من الرخيص وانت عارف انه كذوب بس تسلكله , عاد انت طفحت من كثر ما يكذب , في هذي الحاله اترك التسليك واقعد ازبدله وقله مع احترامي لك انت كذاب << بالله وين الاحترام فيه , يعني هذا النوع ماينفعله الا التزبيد انت سلكله في البدايه بس اذا شفته زودها علطول ازبدله
فلـــســفه :
التسليك شي حلو و يجعل المجتمع مترابط اكثر واكثر ويعم بالسعاده على افراد المجتمع لأنك تعطي المتحدث جوه وهو يحبك لانه يحسبك متحمس مع سالفته , وهذا الشي يجعل المجتمع يسود بين ارجائه المحبه والألفه , وانا شخصيا احب اللي يسلكلي بس مو مره يعني يسلكلي في وقت الازمات .
[ زي مره قلت نكته في فصلنا وماضحك منها الا واحد وطبعا واضح انه يسلكلي بس اهم شي انه طلعني من الاحراج . . وبصراحه حبيته من بعد ذاك اليوم ]
ما يستفاد :
1) لازم تسلك بس مو مره يعني على خفيف
2) لاتنكت واجد ولاتسولف واجد لان بيجي اليوم اللي يزبدون لك الناس فيه
3) يجب عليك التحلي بـ الاخلاق السعوديه